Opel-ის აღმასრულებელი დირექტორი მიხაელ ლოშელერი შემდეგი თაობის Astra-ს შესახებ ახალ დეტალებს გვიმხელს.
გამოცემა Automotive News Europe-თან საუბრისას, ლოშელერმა დაადასტურა, რომ მანქანა EMP2 პლატფორმას დაეფუძნება, რომელსაც ასევე იყენებს ისეთი მოდელები, როგორებიც არის Peugeot 308 და 508. ეს მოსალოდნელიც იყო.
მიუხედავად იმისა, რომ ვაგონების პოპულარობა იკლებს, სწორედ ამ ტიპის იქნება ახალი Astra Sports Tourer-ი. ლოშელერი მოდელის შესახებ ბევრს არაფერს ამბობს, მაგრამ მოდელის დადასტურება დიდად გაუხარდებათ იმ გულშემატკივრებს, რომლებსაც სურთ სივრცე, მაგრამ არ უნდათ ქროსოვერის ყიდვა.
ლოშელერი ადასტურებს იმასაც, რომ Astra ხელმისაწვდომი იქნება ბენზინის, დიზელისა და დატენვადი ჰიბრიდის სისტემებით. რიცხვები სავარაუდოდ Peugeot 308-ის მსგავსი იქნება, რომელიც იყენებს 1.2-ლიტრიან ბენზინის ძრავას 109 და 128 ცხენის ძალით. მომხმარებელს ასევე შეუძლია აირჩიოს 1.5-ლიტრიანი დიზელი, რომელიც 128 ცხენის ძალას გამოიმუშავებს.
უფრო მნიშვნელოვანი კი ის არის, რომ 308 ხელმისაწვდომია დატენვადი ჰიბრიდის ორი აგრეგატით. ორივე მათგანს აქვს 1.6-ლიტრიანი ძრავა, ელექტროძრავა და 12,4-კვტსთ ბატარეები, რომელიც მხოლოდ ელექტრორეჟიმში 60 კმ მანძილის დაფარვას უზრუნველყოფს. საწყისი დონის ვარიანტს ჯამში 148 ცხენის ძალა აქვს, მეორე მოდელს კი 178.
აღსანიშნავია ისიც, რომ ცოტა ხნის წინ, ჯაშუშმა ფოტოგრაფებმა ახალი Astra ამინდზე ტესტირებისას დააფიქსირეს. პროტოტიპი ძლიერ შენიღბულია, მაგრამ სავარაუდოდ აქვს Mokka-ს მსგავსი სახე და უფრო გამოკვეთილი მხრის ხაზი. ასევე ჩანს გარსშემოდენილი ძარა და უფრო მომხიბვლელი უკანა ნაწილი.
