Audi-მ ახალი e-tron GT წარმოადგინა, რომელიც ნამდვილად ერთ-ერთი ყველაზე მოხდენილი ელექტრომობილია, რაც კი აქამდე გვინახავს. აეროდინამიკურად ოპტიმიზებული, დაბალი, საკუთარი RS ვერსიის მქონე მანქანა 637 ცხენის ძალამდე გამოიმუშავებს.
მანქანა ეფუძნება იმავე ელექტრო პლატფორმას, რასაც Volkswagen Group-ის კიდევ ერთი სუპერ სედანი, Porsche Taycan-ი.
საინტერესოა, რამდენად ჰგავს ეს ორი მანქანა ერთმანეთს და რამდენად განსხვავდება? მოდი, გავარკვიოთ.
დიზაინი & ზომები
როგორც მოსალოდნელი იყო, Porsche Taycan-ისა და Audi e-tron-ის თვლების ბაზა იდენტურია და სიგრძეში 2,9 მეტრია. Taycan-ი სიგრძეში 4,96 მეტრია და ამ მხრივ ოდნავ ჩამორჩება 4,99 მეტრიან e-tron-ს. რაც შეეხება სიგანეს, ორივე მოდელის შემთხვევაში ეს მაჩვენებელი 1,96 მეტრია. ოდნავ დაბალია Porsche-ს ჭერის ხაზე — 1,38 მ სიმაღლეზე, e-tron-ს კი 1,41 მ.
ორ მოდელს შორის განსხვავებულია პრაქტიკული ასპექტები. Taycan-ის საბარგულის ტევადობა 365 ლიტრია, Audi-ს კი 405 ლიტრი. ორივე მათგანს აქვს 81-ლიტრიანი წინა საბარგულიც.
თუმცა, მრავალი განსხვავებაა ექსტერიერის დიზაინის დეტალებში. Taycan-ს უფრო დაბალი შუბლური წინაღობის კოეფიციენტი აქვს — 0.22, e-tron-ში ეს მაჩვენებელი 0.24-ს შეადგენს. გამორჩეულად განსხვავებულია მათი ვიზუალიც. Taycan-ი ინარჩუნებს Mission-E concept მანქანის დიზაინის საბაზისო ელემენტებს, Audi-ს კი საკუთარი ხელწერა აქვს ფარებში, ახალ ცხაურაში და წინა და უკანა თაღების უფრო დახვეწილ მიდგომაში. ნაკლებად სავარაუდოა, რომ ეს ორი მანქანა ოდესმე ერთმანეთში აგერიოთ.
ინტერიერი
როგორც ფოტოებიდან ხედავთ, დიზაინის ჯგუფს ძალიან მოუნდომებია, რომ ორი მოდელის ინტერიერი ერთმანეთისგან ძლიერ განხვავებული ყოფილიყო. e-tron GT-ში დაბრუნებულია ზოგიერთი ფიზიკური ღილაკი, რომლებიც Taycan-ში დიდი ხნის წინ გაქრა.
მიუხედავად იმისა, რომ ოთხ მგზავრზეა გათვლილი, e-tron GT-ის აქვს მეხუთე შუა სავარძელიც, მაშინ, როცა Taycan-ს სტანდარტის სახით ოთხი ინდივიდუალური სავარძელი აქვს, მეხუთე კი მომხმარებლის არჩევანზეა. ინტერიერის სხვა გამორჩეულ განსხვავებებს შორის არის Audi-ს MMI ეკრანი, რომელიც მძღოლის მხარეს არის მიმართული, მაგრამ არ აქვს წინა მგზავრისთვის განკუთვნილი ეკრანი, რომელსაც Taycan-ში ნახავთ.
ძარის შიგნით
მიუხედავად იმისა, რომ Audi-მ უამრავი დრო დახარჯა, რათა მისი დახვეწილი საკიდარი და საჭით მართვის სისტემა Taycan-ისგან განსხვავებული ყოფილიყო, საფუძვლები მაინც იგივეა. e-tron GT-საც და Taycan-საც აქვთ სამკამერიანი პნევმატური საკიდარი.
ორივე მოდელს აქვს ორ-ორი ელექტროძრავა, თუმცა Taycan-ი უკვე ხელმისაწვდომია ერთი ძრავითაც.
Taycan-ის Turbo და Turbo S ვერსიებს 616 ცხენის ძალიანი ძალური აგრეგატი აქვთ; პირველი მოდელი overboost ფუნქციით 671 ცხენის ძალამდე ავითარებს, მეორე კი 750 ცხენის ძალამდე. მეორე მხრივ, e-tron GT quattro 476 ცხენის ძალას გამოიმუშავებს, RS კი 589 ცხენის ძალას და 2,5 წამიანი overboost-ით 637 ცხენის ძალამდე ადის.
Taycan Turbo 0-96 კმ/სთ სიჩქარეს Launch Control-ის დახმარებით 3.0 წამში ავითარებს, Turbo S კი 2.6 წამში. ევროპული სპეციფიკაციის Quattro 0-96 კმ/სთ სიჩქარეს overboost-ით 3,9 წამში კრეფს, RS e-tron-ი კი 3.1 წამში.
Taycan-ის მაქსიმალური სიჩქარე როგორც Turbo, ისე Turbo S ვერსიაში 260 კმ/სთ-ია, e-tron GT Quattro-ს შემთხვევაში ეს მაჩვენებელი 245 კმ/სთ-ია, RS e-tron GT-ში კი 255 კმ/სთ.
მიუხედავად მახასიათებლების თვალსაზრისით Porsche-ს უპირატესობისა, e-tron-ისა და Taycan-ის ტრანსმისია ძირითადად ერთი და იგივეა. ორივე მოდელი დაფუძნებულია 800V არქტიექტურაზე, რომელიც 270 კილოვატ-საათიანი სწრაფი დამტენით დამუხტვის საშუალებას იძლევა.
Porsche-ს მონაცემებით, Taycan Turbo ერთი დამუხტვით 450 კილომეტრს ფარავსTurbo S კი 412 კმ-ს. რაც შეეხება e-tron-ს, მწარმოებლის განცხადებით, სრული დამუხტვით ის 383 კმ-ს დაფარავს, RS e-tron GT კი 373 კმ-ს.
რას იტყვით? არის თუ არა ექსტერიერისა და ინტერიერის დიზაინს შორის არსებული ეს სხვაობები საკმარისი, რათა e-tron-ი სხვა მანქანად ჩავთვალოთ? დაჯაბნის თუ არა პოპულარობითა და გაყიდვებით ის Taycan-ს? მოსაზრებები შეგიძლიათ კომენტარებში გაგვიზიაროთ.
